Wednesday, January 11, 2006

ورود و رصاص


أرسم على جدران قلبى تلات شمعات
ليكوا شمعه و ليّا شمعه
و التالته لحبيبتى
أذرع جوا عراوى القميص
تلات وردات
ليكوا ورده و لمصر أمى ورده
تعلقها فى عروة فستانها لاخضر
و التالته ورده لعالم
فتّحت عينى بعد الولاده
لقيتنى باعوم جواه
رغم إن الميه ساقعه
و الريح تزلزل أى مركب
عايزه توصل لأى شط
...........................................

البرد فارد دراعاته حوالين الكون
و الدم ميه اتجمدت جوا القنانى
و الترع و فى الغيطان
جوا الصحارى و شجر الأسمنت
جوا البيوت اللى فوق
و البيوت اللى تحت
و البيوت اللى ماهياش بيوت
...........................................

البرد رصاص
لأ الرصاص برد
يغرز سكاكينه جوانا
فانقول لأ
و يقول معانا لأ قلب الحجر
و يرسم بفروعه لأ غصن الشجر
.............................................

عامٌ جديد عامٌ سعيد
لأ عاٌم حزين
مش عارف أفرح و اللا أحزن
هيا فارقه إيه؟
الفرح ليه و الحزن ليه؟
و كل ده كان اايه؟
.............................................

معركه و ساحتها ألبى
و سلاحها دمى
بين الفرح و الحزن
مديت بإيدى ضربت ألبى
هِمِد..... وقع الحزن فى المصيده
و بات الفرح منصور
و راياته عاليه لفوق
................................................



"The image of the morning sun in a dewdrop is not less than the sun.The reflection of life in your soul is not less than life.
"The dewdrop mirorrs light because it is one with light , and you reflect life because you and life are one." ( Gibran:the prophet garden)

4 comments:

Tamer Nabil Moussa said...

عزيزى اسلام


تسلم ومشكوررررررر

كلمات اكثر من رائعة

كتبت فأبدعت

وفقنا الله لما فية الخير

مع خالص تحياتى

shady said...

هى فارقه؟

change destiny said...

Life is not about the number of breaths you take . It's about the moments that take your breath away .

May your life be filled with moments that take your breath away .

islam yusuf said...

بتاع البليله

انت تشرفنى فى أى وقت و القهوه بتاعتى مفتوحه لجميع الزائرين و الشاى زى ما انت طلبت هايجيلك

شادى ,داليا فؤاد
حكايةتفرق دى احنا اللى بنعملها

change destiny
اتمنى انى استمتع بالدقايق و الثوانى و آخد انفاسى بعمق نشوة الحياه