نص قدم

 نص قدم بين صرير البيبان

تشق صبر الخطاوى، تزُكّ ع الغيم

يبان ليل بيجرى فوق صفايح سُهْد

متنجّرة ف جدار فى أوضة معتّمة

فوق سطوح متشعلقة على حبل دايب

على حافّة طاقة بتبص على نص قدم

تسكن بيوت..تهجر بيوت،

 تجر أحجار الشوارع

تخدش صمت البيوت

تفتح عِرْق ف جبين السّما ..ف ينزّ دم

تلحسه ريح مُتْعَبَة

نص قدم

تهجر شوارع..تهجر سلالم

شقق فاضية..مليانة، أو سطوح

متونسة بفراغ وحدة متسرسبة

من جدار قديم...كان هناك

عند البيت اللى كان فى أول الحارة

و اتغطى بستارة

نص قدم...كَتْ قدم

أصبحت الآن تفتح سكك للعدم.