Tuesday, February 27, 2007

الرجوع للذاكره

أو ل حاجه رجعتلها هيا كتبى ,باتعامل معاها بحنيه و ذوق و هيا فاهمانى , هيا عشقى الأول و الأخير ,,بحس بحميميه و أنا معاها....و أنا فى الجيش ماكنتش أتخيل أنها ممكن تدخل معايا من بوابة الوحده العسكريه, كنت فاكر ان ده شىء ممنوع , هوا ممنوع فعلا , لكن كان بيدخل كده ماعرفش ازاى ,تقدر تقول ستر من عند ربنا ...ما كانوش بيسمحوا إن الكتب تدخل .خاصه الكتب الدينيه ,,,جايز يكونوا خايفين علينا من التطرف .........كنت مره داخل بكتاب (النبى)لجبران خليل جبران ...مكتوب بالإنجليزيه و العربيه ...فرد الأمن كالعاده بيفتش الشنطه بتاعتى و أنا جاى من الإجازه و ده ما كانش بيحصل غير كل شهر مره ..علشان أنا كنت باخد أجازه كل 28 يوم اسبوع ...المهم لقى الكتاب , بصله ,,قال: ايه ده انت مسيحى , انت مش مسلم ...انت اسمك اسلام يعنى مسلم ...هما طبعا مش فاهمين حاجه و لو أنا فتحت معاهم فى الكلام مش هاخلص ,,,قلتله يا أخى ....دى روايه ,,,,,كان معايا واحد صاحبى معاه دبلوم ,قالله ..اللى انت بتكلمه ده راجل مؤهل عالى بيدرس و ده كتاب دراسه ...قال و الله طب خلاص ...ادخلوا
ده موقف لكن المواقف اللى جوه كانت أفظع ...لقيت دماغ ناس عامله قفله خالص ...مكييفين و عندهم انغلاق فكرى مش هاقدر أقول عليهم غير أنهم برجوازيين متعفنين ...و ده التعبير اللى خدته من فيلم ( فوزيه البرجوازيه ) بدلالاته و ده كله ليه لأنهم ماقدروش يقدرو الكتب اللى باقراها ...ألاقى تعليقات سخيفه.(يا أخى بلاش فلسفه ....ايه الكتب العبيطه اللى انت جايبها دى ...هاتفيدك بإيه )هما مش فاهمين أنا هاعذرهم, بصوا ..أنا هاجبلكوا مثل من الكتب و انتوا تحكموا
  1. ابتسامات القديسين روايه لإبراهيم فرغلى
  2. النبى لجبران
  3. سلامتك من الآه لعبد الوهاب مطاوع
  4. great expictations ....charles dikens
  5. عن النهج العلمى لديكارت
  6. القاهره المحروسه لعباس الطرابيلى
  7. التاريخ الإجتماعى للقاهره العثملنيه لأندريه ريمون
  8. انجيل آدم ...محمد علاء الدين
و غيره...........
أنا مش لاقى مكان احط فيه الكتب ..بافكر أأجر مكان فى الشارع افرش بيه الكتب و اقعد أثقف و أقرى فى الشارع ....الدولاب بتاعى مليان و تحت السرير و فى المكتب و تحت المكتب و تحت المخده و فوق المخده و تحت المرتبه ......مع إن فيه عندى مكتبه ..بألب الورق... أوراقى القديم أشمها و اشم ريحة الكتب و ده البرفان المفضل عندى ...و فى مشروع نفسى اعمله بدل الفراغ اللى أنا فيه ده و هوا إنى أعصر الكتب و أعبى زيتها المنور فى أزايز و أوزعه على الناس......................لقيت ورق كنت كاتبه و مهمله ..هوا أكيد حاسس بالزعل لكن اللى حس أكتر هواأنا ....كنت عامل خطط مستقبليه للمدونه بتاعتى ...كتابات كنت عايز أكتبها و الجيش أخدنى منها و اغتصبنى....كنت عايز أغير لشكل جديد ...كل ده لقيته فى الورق ...حياتى كلها ورق.........كنت حاطط مخطط لقراءات آتساءل عن طريقها وأسأل نفسى أسئله شائكه و هيا عن ربنا و وجوده و صفته و هل هوا موجود فعلا ...أنا قبل الجيش كنت حاير تايه ,قلقان .....ماتعرفوش الجيش ده كان بالنسبه لى ايه ...كان مرحله مؤقته للتوقف عن التفكير و الكتابه و تذوق الحياه و التساؤل .....بصراحه كان ان الألوان كلها اتوحدت فى لون واحد و ده اللى أنا ماكنتش طايقه

16 comments:

koukawy said...

طيب انا هحكيلك حاجه شبه كده بس مش في الجيش بقي 00
اختي بتشتغل في شركة كمبيوتر و المفروض انها شركه كويسه يعني
و بتاخد معاها كتاب دايما عشان تقرا 00
فكانت معاها كتاب لمصطفي محمود
زمايلها قالولها 00
مين مصطفي محمود ده بيبيع ايه؟؟؟؟؟؟؟؟
تخيل وصلت لدرجة ايه

hosnysoliman said...

الاخ العزيز اسلام
سعدت بالزيارة والتعليق جداوكلامك معاك حق فيه انا شفت اللى انتى شفته بس انا عايز اقلك حاجه انا رسمت اللوحه دى اكثر من مره وعلى فكره كل مره الاحساس والوان نظرة العنين تكون مختلفة ولللاسف اللوحتين التنين مش عندى بيعوا وكل واحده فيهم لها مذاق خاص على فكره ده راجع للفترة والوقت والمود اللى كنت فيه ساعة رسم اللوحه
ولكن علشان خاطرك انا حارجع تانى اروق نفسى احاول اغير فى الملامح علشان تصادف هوى القبول عند اعدك بذلك وسوف يكون لها بلوج خاص اشرح فيه الموضوع ده وانا سعيد بزيارتك وسوف اعود للمدونه بتعتك على رواقه لانه واضح انك انسانمثقف وواعى واتمنى ان يكون بيننا تواصل فى اللمستقبل

shady said...

يا بختك بصحابك يا سيدى

دعاء عادل said...

مرحبا بك وبعودتك للحياه
بجد الله يكون فى عونك عارف اصعب شىء فى الوجود انت تتعامل مع حد مش فاهمك
وبجد مبروك عودتك لعالمك مرة اخرى
ونسيبك بقى لعشقك لاول

nuh ibn zbigniew gondek said...

As salaam alaikum.

I write. Come by inshallah.

Wa salaama,

nuh ibn

islam yousef said...
This comment has been removed by the author.
islam yousef said...

كوكى
ده شىء مش بعيد ان ده يحصل
الحياه فى مجملها بقت حياه سطحيه
ليه وجع الدماغ والتفكير
الثقافه دى شىء فى طريقه للزوال



أستاذ حسنى سليمان

انا سعيد جدا انك مريت على المدونه المتواضعه بتاعتى وده شرف ليا
وسعيد أكتر إن انت أخدت رلأيي موضع التفكير
واتمنى انن نتواصل ونكون من الأصدقاء


شادى
الله يخليك
مانت برضه من صحابى



دعاء عادل
شكرا للتعزيه الجميله دى
للأسف اللى بيفهمونى وجدتهم فى عالم افتراضى هوا الانترنت وعالم المدونات وده المجنمع اللى انا هربت ليه علشان الاقى
اللى يتجاوب مع مستوايا الفكرى
انا بقول للأسف علشان لحد الوقتى مافيش مجال للقاء
انا عندى رغبه جامده انى اعمل صاقات مع المدونين واننا نعمل مجتمع مثالى بعيد عن الواقع الصعب

أحمد شعبان said...

انت فعلاً قريت ابتسامات القديسين لإبراهيم فرغلي.. تحفة يااسلام

Gid-Do - جدو said...

اسلام

اول شئ مبروك خروجك من الجيش وان شاء الله تتفتح قدامك الابواب وتبدء حياتك البوست بتاعك اللى كان عنوانة باقى ستين يوم بيفكرنى بنفسى وانا بقول فاضل سنة واطلع نفسى معاش ـ بحكم ان الخروج على المعاش هنا بالمزاج ـ وارجع مصر انت تريد ان تبدء مشوار وانا اريد ان انهى مشوار وهكذا الدنيا ـ تحياتى

nilerebel said...

صديقى العزيز
مبروك خروجك من الجيش وزى ما قال جدو فوق هتلاقى موضوع انك تعد الايام هيتكرر معاك فى حاجات كتيير .وانا كمان بعدها الوقتى علشان قربت امزل مصر خلاص .اشوفك فى المنصوره ان شاءالله

islam yousef said...

أحمد شعبان
مش هاأدر أقولك انى دى فعلا (ابتسامات القديسين) من أجمل الروايات اللى قريتها
و ماكنتش أعرف ان المنصوره جميله اوى كده مع انى منها
يعنى الاستاذ ابراهيم فرغلى بلدى ...بلدياتى يعنى
و نفسى يكون بينى و بينه اى صله
شكرا على تعليقك و اتمنى التواصل


جدو

الله يبارك فيك و يارب يسمع منك
انا مش عارف انت ناوى ترجع ليه
كل الناس الوقتى بافكر انها تروح ماترجعش
كل الشباب بيفكروا فى الهجره
الجو هنا مايسمحش بتنفس الحريه
بلدى هى وطن حريتى
و مع ذلك صر أمنا


nilerebel

اذا كنت راجع مصر فى اجازه فانت تشرف
اما اذا كنت راجعها للابد
فأرجوك تفكر من جديد
أتمنى اننا نتقابل اما ترجع بالسلامه انشاء الله
و ده تليفونى
0502797620
0100429322

raspoutine said...

دعوة عامه لكل المدونين المصريين لحضور اللقاء الثالث الذى تحدد موعده من قبل المشرفين عليه والمؤسيسن له


وذلك يوم


الجمعه الموافق 9/3/2007


بدار الاوبرا المصريه


كوفى شوب الابداع


بجوار دار الابداع بداخل الاوبرا


والدخول للمكان من البوابه الخلفيه للاوبرا امام النادى الاهلى


والحضور بالملابس الشتوية




هنستناك نشرب الشاى سوا

change destiny said...

حمد الله عالسلامة

كفارة

ارجع لاصحلبك و استمتع بصحبتهم كتاب كتاب بس متنساش تدون

:) في انتظار تدويناتك

mohamed said...

اسلام
ان شاء الله نازل اجازه .وده ما يمنعشى انى نفسى انزل نهائى لو فيه فرصه بس دى شكلها بعيدة شويه .وده تليفونى فى مصر 0502345991...هقابلك ان شاءالله فى المنصوره

islam yousef said...

أيمن فاروق ..راسبوتين
انا بعلق بعد معاد اللقاء
انا آسف
كانت فرصه كبيره انى أحضر لقاء للمدونين و خاصه دى كانت أول مره أعرف ميعاد لقاء لهم بعد ما خلصت الجيش
أنا اللى منعنى الشديد القوى
كنت على سفر لمدينة دمياط الجديده
و روحت يوم الجمعه بالليل
أتمنى ان يكون فيه فرصه تانيه
نشرب فيها شاى سوا
و دى أعتقد هاتكون قريبه انشاء الله



change destiny ندى
الله يسلمك
هيا فعلا كفاره ...أعتقد
ربنا يعيننا على التدوين


محمد
مش بعيده شويه دى بعيده أوى
اتنمى انى اشوفك قريب
أنا معايا تليفونك و انت معاكم تليفونى ياريت نكون على اتصال اول ما توصل مصر بالسلامه

Eman M said...

حلو موضوع انك تعمل عصير من الكتب دة :)