Saturday, March 10, 2007

الذوق خرج من مصر




أيظن ...تراتاترا
انه مولع نارى......أيظن ....اه مش عارف ايه...إلخ

العنب العنب العنب
أحمر ..و أصفر و أخضر و برتقالى و موف و فوشي

سسسسسيد يا سيد
سيد يا سيد




أهرش رأسى محاولا تذكر باقى الكاسيت الملىء بالفن و المتعه و لكن خاب رجائى و أملى فى التذكر .........كنت راجعا من سفرى من مدينة المنصوره ..مرهقا تعبا آتيا من مدينة دمياط الجديده عبر المنصوره ثم مدينة بلقاس الى أقطن بها ,,ركبت العربه البيجوه من المنصوره فى المقعد الخلفى أنا و أخى...جاءنا السائق بزبون آخر فى الطريق.....كان الوقت متأخرا , لم نعترض حينما زج به بجانبنا رغم سمانته , أدخل الكاسيت و شغله , و انسابت الألحان وادعة تسكرنا بهدؤها الكئيب, كان بعرور يتبعرر علينا و ان سعد الصغير يتحفنا بأغانيه السعيده الصغيره .................فى نهاية الرحله كانت مشاعرنا مفعمه بالفاكهه من بلح و عنب و تعرفنا بالأخ سيد الذى ينادون عليه و هو لم يعبرهم

أتذكر "ماهر العطار" فى اغانيه الشعبيه"ياما زقزق الجمرى على شجر اللمون" و غيرها

كان الذوق مازال ساكنا مصر و لكنه حينما رأى من المصريين عجبا , وو جد ماهم فيه من صمم و ما حدث لآذانهم من تدهور ,,,,,,قررأن يغادر مصر بلا رجعه إلى أرض لا يعلمها إلا الله

لقد حادثته إنه يرى أن الإستماع إلى fifty sent خير من الإستماع اليهم و أن أنستازيا ,,تطربه عنهم

سؤال مهم ....ماذا حدث للغناء و الطرب فى مصر؟

و ماذا حدث لأذواق المصريين فى السماع؟

10 comments:

Dananeer said...

متقوليش انك مسمعتش الحنطور
و درجن درجن

مش ممكن بجد
انا لسه راجعه من فرح قريب
و لقيتنى بدل ما عايزه اكتب عن اعز صاحباتى
عايزه اكتب عن طقوس الزواج الغريبه
و اولها الاغانى الجميله
اللى خلاص اتعودنا على وجودها ضيف مفروض!

change destiny said...

يا عم الناس بتشرب عشان تنسى .. انا كل ما حد من اصحابي يمسك موبايلي و يقلب فيه.. يرجعهولي و يقوللي الله يقرفك .. مش عارفة ليه

لا عارفة ليه عشان مفهوش العنب العنب العنب

ومفيش اي حاجة تانية بتنفع في شتا او صيف يا عم يا عم ياعم

:)

أميرة البلطجية said...

اصبح عليك عشان تسمع حاجة كويسة انك تقلب في مكتبة القديمة بتاعت بابا وماما وجدو عشان تطلع موسيقا وكلمات ليها لزمة وتتطربك
متحرقش دمك كتير في الاغاني الجديدة..دي ليها جمهورها اللي بيطالب بيها..وظهور الاغاني دي واذهارها انعكاس لثقافة الناس لدوقتي
وخلى الشعب يعيش عبى رأي ريكو

Anonymous said...

Marhaban..

A blog that is very Jiddan!
Sadly cannot read Arabic!

Salam

koukawy said...

ebn 7alal mesafy
انا لسه كاتبه بوست علي الموضوع ده اسمه
انا هعبّي شريط
يخص الذوق العظيم اللي مصر بقت فيه

islam yusuf said...

دنانير
هوا فيه حد لسه ما سمعش الحنطور
بصراحه ضيف تقيل
مش عارف احنا مستحملينه ازاى
المفروض اننا نعمل حركه انقلابيه غنائيه

change destiny
ما هو انتى لازم علشان تشربى و تنسى
لازم تسمعى العنب و ده بدل ماتسمعى
عايزه تنسى أى حاجه أو كل حاجه
اسمعى العنب و انتى تغيبى عن الوجود
حل كويس لجميع مشاكلنا

أميرة البلطجيه
انتى هاتلطجى و اللا ايه
انتى بتتكلمى عن الشعب المصرى بطريقه بلطجيه اوى
خفى شويه لا تحصل ثوره ضدك



koukawy
الله يخليكى
أعتقد ان جميع المدونين الوقتى بقى عندهم توارد خواطر
و دى حاجه تدل على الاجماع
رغم الاختلاف فى المعالجه

دعاء عادل said...

ماذا حدث لأذواق المصريين فى السماع؟

قول ايه اللى ما حصلش
للمصريين

-_- said...

الموصوع مش موضوع غناء و بس الموضوع بقى منتشر في كل اعلان و في اي حاجة

راجع الموضوع ده

sharm2t.blogspot.com/2007/02/blog-post_26.html

Bassma said...

سؤال عجيب .. بقه بالزمه مش عارف ؟ .. ما هو الفن زي اي حاجه تانيه في مصر .. زي الناس التايهه و الشوارع المكسره و مليانه زباله و زحمه و اللبس العجيب و الاكل المسرطن و الميه الملوثه و الهوا غير الصالح و التعليم اللي قلته ارحم علي الاقل نسب الغباء الفطري مش هتزيد .. لما يبقي يتصلح حال كل دول .. هيتصلح حال الفن .. و بشكل تلقائي علي فكرة

السهروردى said...

طيب حأقولك على حاجه
أنا بأحب سيد يا سيد جدا جدا لأن إيقاعها بيفكرنى بأغنيه تانيه شعبية
بتقول "روح إتجوز يا عبده/ قمحك سوس يا عبده"
ودى أغنيه تراثية مهمة للأفراح المصرية
سيبك من أنى بأظبط ناس وعيهم بالغناء أعلى من ناس كتير وبيغنوا "أيظن والعنب عماد بعرور" وعادى جدا
بس طبعا مش بيسمعوها ليل نهار يعنى زى الباقيين
لكن ده يكفى

كل الأغانى الشعبية بتعبر عن مرحلتها اللى ظهرت فيها
فى الثلاثينات كانت أغنيه "إرخى الستارة اللى ف ريحنا"
وأغانى عزيز عثمان "يا خارجه من باب الحمام وغيره"
وفى الخمسينات والستينات كان هناك "قنديل " و"عبد المطلب" و"محمد طه" و "شكوكو"
سيبك من خضرة محمد خضر والجيزاوى
(واللى كان شخصية متعلمة ومثقفه جدا)
وده كان العصر الذهبى للغناء الشعبى فى مصر

بعد النكسة وفى السبعينات كان في عدوية
سؤال جانبى بتسمع عدوية ؟
عدوية كان بيمثل مرحلة الإنفتاح هو وكتكوت الأمير
وظهرت المعانى المعبرة عن الفترة دى زى "إكمنى مسكته السلم شعلقنى فى الهوا وفلّق"
واللى كتبتها الشاعر عبد الرحيم منصور على فكرة واللى كتب مجموعه كبيرة من مواويل كتكوت الأمير فى بداياته
"وإحنا اللى دهنا الهوا دوكو"
"حبه فوق وحبه تحت"
وغيرها من التعبيرات اللى ممكن تتخذ فيلم الكيف كمرجع مهم ليها

مروراً بحكيم وغيره فى التسعينات
الغناء الشعبى فى مصر بدأ مرحلة جديدة بتعبر عن كل الظروف الأقتصادية والإجتماعية للطبقه الفقيرة فى مصر
راجع أغنيه "المولد" لو كنت سمتعها قبل كده ودى كانت أول غيث الألفية الجديدة
ده موضوع كبير جدا ممكن أتكلم عنه بلا توقف بس فى الآخر
انا عايز أقول
إذا حال الطبقه الشعبية فى مصر انصلح فأغنيتهم حتترقى بطبيعة الحال