Sunday, March 25, 2007

حالة ملل


أصحى من النوم كل يوم على نفس الموال و الشريط المسفوف , أعملى كباية قهوه علشان تزيح الغشلقه الصباحيه و لو أنها مش صباحيه اوى على أساس إن صحيانى بيكون حوالى الساعه الواحده ظهرا, أأقوم أفرك عينى و أأقول مساء الخير....أتقلب فى السير ييجى ساعه أو ساعتين على ما أحط نفسى فى مود المتيقظ....أحاول إنى أزيح اللحاف و البطانيه عنى بتاباطء و خمول...أتمطع....أرجع للنوم تانى , أأقوم بعد طقوس الاستيقاظ اللى اتمطت من خمس دقايق لخمس ساعات ...قبل ما أفكر فى أى شىء أحاول أخلق لنفسى مود نفسى معتبر مخلوط بكباية شاى بالحليب, مع قطعه من التوست, اللى مع قرمشته المفتريه راسى بتقرمش مليون مره فى الثانيه, محاوله البحت عن مخرج, الغثيان ...روايه لجان بول سارتر ...أجدنى متلبثا ببطل الروايه, ألهث وراء افكاره العبثيه فى عالم عبثى, جايز الجيش حطنى فى مرحله فارقه وجوديه ..ممكن يكون حطنى فى مأزق .........و سهانى عن السؤال المهم ..إيه اللى جاى بعده, ماكنتش فكرت ..تفكيرى كان واخد أجازه كان بيلعب فيها لعبة الصمت .


فى بروجرامى المستفذ take tour

بنام الساعه اربعه الفجر قبل أدان الافجر بخمس دقايق..أصحى ما يقارب الساعه واحده أو اتنين...أفطر فطارا سريعا ...علشان ألحق ألعبلى كام خمس تاشر ساعه جيمز على الكمبيوتر ...فى تأفف ..أزهق, أطهق ,,أطء ....أرمى نفسى فى صدر كتاب لمجرد فعل القراءه ..حتى يغلبنى النعاس.

يوم ممل ....أنا مملول إذا انا ميئوس منه على رأى عمو ديكارت ....هيا الساعه كام الوقنى

هووووووووووووف...أسيبكم بأه و أروح العبلى دور جيمز

21 comments:

hosnysoliman said...

الاخ العزيز اسلام
هذه المرة الاولى التى اسعد بها فى مدونتك كما انها المرة الاولى التى سعدت فيها بزيارتك
من عادتى عند الدخول لمدونة اول مرة ان اتصفحها على وجه السرعة على امل التعرف على قدر من شخصية المدون
وكذلك بنية الرد عليه ومن حسن حظى ان مدونتك السابقه ردت على اتهامك لى بالنوستو لجيا لا انكر انا مش عارف يعنى ايه ولكن تفسيرك لها بينها وهو تقديس الماضى واعتباره افضل من الحاضر
انتى ايه رايك فى عبد الحليم وعبد الوهاب وام كلثوم وفيروز وحتى عدوية وكمان شكوكو اللى يمكن ما توعاش عليه
هل هناك مكان للمقارنه بين محمد الصغير وعدوية محمد عبد المطلب وشكوكو وهذا السعد
انتى اللى بتسال الذوق راح فين..احنا على ايامنا لما ماكنتش تحب تسمع حاجة كنت تسمع عدوية
انتى على ايامكم حتى اللى ممكن الواحد يسمعهم موتوهم عل الحجار والحلو ومدحت صالح وماجدة الرومى وكاظم الساهر
الفنان عمره الفنى لا يزيد عن سنوات قليلة
اليس هذا دليل على ان الزمن غير الزمن وكل ما يمر يوم الاحوال تزداد سؤ عن سؤ
مين اللى خلها سؤ ومن غير ذوق؟احنا طبعا
الاخ العزيز انا لاجبت سيرة جمال والسادات ومبارك دول ملهم العيب فينا احنا تفتكر لو احنا كويسين ممكن يحكمنا واحد مش كويس تفتكر لو احنا مش طماعين كان يحكمنا واحد طماع هو والحسالة اللى حولية
لا العيب مش فى الزمن ولكن ديما العيب فى اهل الزمن
ارجو ان تكون رسالتى قد وصلت
وغلى فكرة الكلام فى هذا الموضوع امره يطول
ودى مش البتاعة اللى بتقول عليها النستو لجيا دى

-_- said...

بتنام قبل الصلاة بخمس دقائق

و اسمك اسلام ؟؟

اعتقد انك بتسخر من حال الشباب و مش بتتكلم عن نفسك

صح ؟

koukawy said...

طب صحيح مش بتصلي الفجر بالمره ليه ؟
انا يومي شبه ده بس بيتخلالوا الشغل الكتير بس بنام كده برضو و بصلي الفجر انا بشجعك اهو عشان تصلي الفجر
و ميرسي علي دخولك العشه عندي كتير
كوكو مبسوط منك انت كميل

dandana said...

لا والمشكلة ان الميوزيك اللى انت حاططها دى تنيم مجرة بحالها اصلا....

بالنسبة للموضوع ..بتهيألى دا حال ناس كتير اوى....
بنات واولاد.....

للاسف مافيش هدف...
ولو فيه مش عارف له طريق....
ولو عارف الطريق مش هاتقدر تمشيه من مطباته....
يبقى الواحد ينام احسن...بس يصلى الفجر....

سعيدة بوجودى...وسعيدة انك بلدياتى...

Tamer Nabil Moussa said...

ازيك اسلام اخبارك اية

خلصت الجيش ولا لسة

بوست رائع

تحياتى

islam yusuf said...

شارم
كوكاوى
دندنه

مش عارف اقولكو ايه بس يا جماعه
الحاجه االوحيده اللى شايفكوا متفقين عليها
انى ماصليتشى الفجر
احنا هانبتدى فى المواعظ و اللا ايه
انا شايف التدين واخد مجراه فى مصر
و على العموم مش هانسى اصلى الفجر بعد كده
لنى هابدأ انتظم ف ى النوم
انا تعبت اوى من السهر




تامر
ايوه ياعم انا خلصت جيش
مش تباركلى
و آعد عواطلى بعيد عنك

Just Me said...

كنت لسه هكتب بوست شبه ده
عن الايام اللى شبه بعض دى و مش راضيه تخلص

دعاء عادل said...

صباح الفل
عارف الروتين ده حلو اوى انا بعمل كده ومستمتعه بحياتى جدا عندى مشكله واحده بس انى بصحى من النوم الاقى اليوم خلص ومش بيبقى عندى وقت اعمل اى حاجه
نفسى اليوم يبقى اطول من كده
عشان ماحدش يقول عليا كسلانه
عارف يا اسلام انت الوقت ده ممكن تستغله احسن استغلال كفاية انك عندك وقت تقرا براحتك ودى فرصه عبقريه انك تكتب استغلها واعمل بروجرام لنفسك انك فى فترة زمنيه معينه تبدأ تبنى قواعد روايه مثلا
ممكن يكون اللى بتقول عليه ده ملل بس بص للاجابيات اللى فى الموضوع

samvet said...

اسلام
اهلا بيك وسعيد بوجودى هنا لاول مرة
طبعا هحسدك واقولك يبختك خلصت جيشك
بس بردك صعبان عليا من اللى انت فيه
بص يسيدى مش هنصحك واقولك اسهر وصلى الفجر قبل متنام واصح بدرى وكدا
لان ممكن اى حد فينا بيمر بالمراحل دى فى فتره من فترات عمره
بس الفكرة الاجابة عن سؤال؟
طبعا سؤال كنت بوجهه لنفسى لو دخلت ف النظام ده
لامتى؟
تعرف لو دورت هتلاقى الاجابة
حتى تصبح يوما مسؤلا
ابحث عن طريق تجد فيه نفسك
وستجد لو حاولت

تحياتى الك وارجوا ان اعود واراك فى احسن حال

ملحق جيشى 3 سنين مش سنه ولا اتنين فادعيلى كدا ربنا يصبرنى

-_- said...

يا اسلام يا حبيب قلبي

لا مواعظ و لا حاجة

هي الصلاة دي دي موعظة او تفضل من حد على دينه ؟

الصلاة دي فرض .. يعنى انا لما بصلى الخمس فروض ابقى انسان عادي لا متدين و لا حاجة التدين اكبر بكتير من الصلاة

الصلاة دي حق ربنا و عشان مبقاش مسلم بالاسلام فقط

على فكرة مش بديلك مواعظ و لا نصائح انا برد عليك بس و مقصدش اضايقك

سلام

~ Bato0ot ~ said...

dawar 3ala shoghl :D wala dawart :D?

islam yusuf said...

just me
ده فعلا موضوع يستحق الكتابه عنه كتير
شكرا على التشريف

دعاء عادل
صباح الورد
أنا أول مره أشوف حد بيمدح فى الروتين ده , انتى اكيد بتستمتعى بالملل
و الله كل واحد و له طقوسه الخاصه
أنا حاسس بالملل
فاهمه يعنى ايه ملل؟

المشكله برضه أن انا مش لاقى وقت اكتب رغم الفراغ اللى انا عايش فيه
تقدرى تفسرى ده؟

الكتابه عندى شىء مقدس و أعتقد هيا النشاط التانى فى بروجرامى بعد النوم طبعا
هاحاول آخد بنصيحتك
بس مش هاوصل لروايه
كفايه أوى قصه قصيره
أو قصيدة شعر
تحياتى


منصوراوى
ازيك يابلدى
زى مانت شايف
الموضوع مافيهوش حسد
دانا يا اخى باحن لأيام الجيش
أكيد الواحد مش هايفضل كده على طول
لازم الواحد يدور على حاجه تانيه يمل منها

ماشى يا عم الظابط
تلات سنين يعنى ضابط
أقولك من هنا و رايح يا فندم
ربننا يعديهوملك على خير
و انصحك تكون ضابط محترم و يكون البك على العساكر دول غلابه
سلام


أحمد شارم
لالالالالا الموضوع مش كده
و الله يا عم أحمد مافيش زعل و لا حاجه
أنا معروف عند زمايلى بسعة الصدر و ان انا باقبل الرأى الآخر و أحترمه
و بالنسبه للصلاه
أنا باعترف ان انا مقصر
و اكيد كل انسنان بيمر بمرحلة التقصير دى
الإيمان يزيد و ينقص
تحياتى يا حبيب قلبى


bato0ot
أنا فى مرحلة البحث عن الزمن المفقود
و أكيد بعد أما لافيه هادور على شغل
و مع ذلك انا بادور
دى حاجه ضروريه
شكرا على المرور
شربتى الشاى؟

Anonymous said...

انا كمان زهقانة موت حتى الجميز زهقت منها و دورت على شغل لحد ما طلع عينى الحياة مللللللللللللللللللل

Anonymous said...

بص يبنى الدنيا دى مقرفه انا برضو حالى حالك بالظبط بس انا عندى الكليه برووح وبرضو ملل ف الكليه الناس مقرفه جدا ودا ان اهقولك لعلى حاجه غريبه انا الولد الوحيد ف الدفعه بتعتى والباقى كله بنات اة متستغربش احنا كلنا اصلا 50 يعنى ملل بجد واصحابى كلهم بعاد عنى دا حتى العيال الل ىاعرفهم ف الكليه كل محاضراتهم عكس محاضراتى يعنى مفيش غير يوم واحد اعد معاهم فيه يلا ربنا معاك يا رب انا اسمى عبدالرحمن وعاوز اعرف بس الاغانى الحلوة دى اللى انت حطتها جيبها منين ومين اللى بتغنى اغنيه عصفور طل من الشباك دى

kareee said...

يا باشا صباحك ابيض

بس معلش
خلينا نتكلم من اول السطر

قصتك جميلة بس لنت بتحكيها غلط وكل الى سمعها مفهمهاش
لكن جميل انك بتقرى لعلماء غربيين فى مجالات مختلفة بس انت اكيد متعرفش ان اغلب العلماء الغربيين عندهم امراض نفسية بالعبيط بسبب عدم وجود الدين وخلافة ولون دة مش موضعنا دلوقتى
احنا بنتكلم عنك

قصتك دى بتفكرنى بالبطك
البط هو الكائن الوحيد اللى عايش يتظغط وينام وهو مش عارف انة فى الاخر هيدبح

معلش متزعلش منى لا اعرفك ولا تعرفنى بس لازم تخدهم منى نشفين شوية

وعلى العموم
حللك عندى
ومش صعب
بكل بساطة اشغل وقتك اخرج من البيت
الهدف من الخروج مش مهم
لكن اخرج شوف ناس جديدة
مش شرط تتعرف عليهم لكن شوفهم عايشيين اذاى
اعمل نفسك باحث واتفرج الناس بتعمل اية
متحبسش نفسك فى قمقم وتعمل فيها شهيد

ومش محتاج انى اقولك صلى او لا اكيد انت فاهم


وصفة سهلة صح
وابقى طمنى عليك

Anonymous said...

معلش ياجماعة

بس سؤال وجعنى شوية

نفسك تشتغل اية
كل واحد نفسة يبقى سفير او مدير بنك
انا مش بتريق واللة
بس كل واحد يا جماعة بيتكلم محسسنى انة خلاص الدنيا بقت سودة ومش عارف يتصرف

واللة يا جماعة الشغل فى بلادنا على

قفا مين يشيل
دايما الحل فى ادينا لكن مش شايفيينة


انزلو شوية من القصر العالى وهى هتتظبط لوحدها
اية بقة

Anonymous said...

ana mish motswera en elwelad 3ndhom nafs elmoshkela dee anta eldonia 2odaaamk anzel we 2sht3'l 2y 7aga 2y 7aga leha 3lka belt5soss bet3k 7ta lw elfaida elmadia maknetsh kebeeera bas akeed 7tstfaad..... m3leesh akeed el3eeb feeek we enta elwe7eed ely b2deeek t3'iar elrotine daaa

Anonymous said...

ana mish motswera en elwelad 3ndhom nafs elmoshkela dee anta eldonia 2odaaamk anzel we 2sht3'l 2y 7aga 2y 7aga leha 3lka belt5soss bet3k 7ta lw elfaida elmadia maknetsh kebeeera bas akeed 7tstfaad..... m3leesh akeed el3eeb feeek we enta elwe7eed ely b2deeek t3'iar elrotine daaa

Anonymous said...

elmoshkla mish fe elsho3'l 2nta momkn tsht3'l we t7s benfs elmalal elmoshkla enk mabt3melsh 7aga 2nta bet7ebhaa 2sh3'l w2tk b7aga 2nta bet7ebha 7ta lw 5roga m3 7d bet7eboo ;);):D moklmet tele 2w 2y hwaia enta bet7ebhaa b3d shwya 7t7es enk gwak taka 3ayez fe3lan tesht3'l we teb2a 7aga kwyesaa rabena ywf222k isa

lovely care said...

حلوه اوى الاغانى اللى انت حاتتها وكمان اللوحات جميله خااااالص

Rosittanita said...

صباح الخير

سعيده لوجودى فى مدونتك وبصراحه الموضوع
ده بيعانى منه ناس كتير انهم مش عارفين ازاى يخرجوا الملل من حياتهم

وموضوع القراءه بيكون لطيف لانه بيخرجنا لفتره من حاله الملل

ساعات بحس ان الملل بيجى لما منعرفش نخرج نفسنا من حياتنا الروتينيه بس تقولى نخرج نفسنا ازاى من حاله الروتين دى أقولك معرفش وونبى لو عرفت أنت ابقى عرفنى

موضوع جميل وصياغته حلوه

أطيب تحياتى
Rosittanita