Wednesday, November 14, 2007

30سنة سلام


لو جينا نبص على وضعنا بعد معاهدة كامب ديفيد هنقدر نعد المكاسب بالزكايب إكوام ...إكوام ...حاجات كتير و دى أولها: الجيش ..أيوة الجيش , بعد إتفاقية السلام و الجيش عايش فى انتخة لحد دلوقتى ..يعنى جيش أنتيخ من فعل أنتخ يؤنتخ فهو انتيخ و إذا نظرنا لجيش مصر بالذات بعيدا عن الجيوش العربية -إذا كان أصلا فيه جيوش عربية- و لو فيه جيوش عربيه هانلاقيها متكحرتة زى سوريا و لبنان و العراق...هانيجى نبص على المكسب ده نلاقيله توابع و هوا الريادة يعنى دور مصر الرائد فى عملية أنتخة الجيوش العربية و االدول العربية فى االمنطقة.:

نأتى إلى مكسب آخر و هوا إن العملية أدت إلى فراغ النملية ..سورى..أأقصد الحكومة المصرية و تفرغها للهم الداخلى و عكننتها على الشعب المصرى اللى خلاص فضيت له و عملت له حملة إعلامية لتسييسه حسب رغبتهاو إنها حولت إهتمامه من إهتمام قومى عربى إلى إهتما برغيف العيش و الجرى على الولاد اللى مصاريفهم كل يوم بتزيد و الأسعار المولعة اللى كل شوية تولع.

مكسب آخر أحرزته الحكومة المصرية ...فبعد عملية السلام أنشأت مصانع كتيرة لإنتاج عجلة السلام اللى محتجة حد يدفعها , فكتر الإنتاج و كتر الدفع.. وبكدة مصر بقت رائدة فى صناعة العجل فى المنطقة العربية , بل و بقت بتصدر و بقت للمصريين خبرة فى عملية الزق.

كمان السلام أتاح للتليفزيون المصرى الترفيه عن الشعب بالأغانى و الكليبات و الأفلام الكوميدى و كمان مسلسلات ..أحمدك يار رب....علشان الشعب يهيص..هوا الشعب ناقص عكننة..بلا فلسطين بلا إسرائيل بلا دياولو.


و سياسة سد الحنك اللى بتعملها معانا أمريكا أدت لغنى الشعب المصرى و خفخته من المعونة الأمريكية اللى معيشانا فى نعيم و من يومها و إحنا بناكل و بنشرب فخفخينا.


أما بقة لو جينا لخسايرنا فإحنا لحد دلوقتى لم نستدل على خسائر تذكر .....دا إحنا حلوين أوى.

8 comments:

Marwa said...

بأكتب لك من مكان عملى العاجى الذى يملأ فيه الفراغ زكايب كتييييييييير ما هو أصل احنا مش محتاجين الشغل اصلاً ونشتغل ليه اذا كان السلام حقق لنا كل حاجة لدرجة ان احنا مش محتاجين الشغل وكفايه علينا ارهاق الانتخة

تحياتى

على باب الله said...

بصراحة مش فاهم وجهة نظرك في موضوع أنتخة الجيش ؟

أنا شخصياً شايف أن الجيش هو واحد من أكثر الإدارات تنظيماً في مصر

و كنت أخدت كام كورس تبع القوات المسلحة و بصراحة وجدت أماكن جميلة و حضارية و معاملة رائعة

و كمان المصانع الحربية شغالة كويس جداً .. و من المصانع القليلة اللي أنتاجها ثابت

لو سمحت فسر لي وجهة نظرك في موضوع الجيش أكتر

goodman said...

على فكرة انا طول عمرى ضد كامب ديفيد
وانت عارف كدة كويس

Tamer Nabil said...

السلام عليكم

ازيك ياعم اسلام فينك


السلام يحتاج الى قوة تحمية ودة لو كان الطرفين فعلاا عايزين سلام

اسرائيل بضيع وقت وبس لانها مش عايزة سلام والاطماع اللى عنيها عليها مش هتنتهى ابدا هكذا عرفرعنا وعلمنا عنها وارجع الى التاريخ القريب والبعيد

تحياتى

micheal said...

بغض النظر عن اعتراضي علي الكثير من بنود هذه الاتفاقيه التي أراها مجحفه جدا بحقنا الا أني أختلف معك في نقطه أنتخه الجيش
تحياتي لك

عين ضيقة said...

ماشى ياعم

بلدياتى بقى وكده
اقول اللى ف نفسى كله

الاول اسم البلوج كويس جدا
فنجان الشاى ده اهم شىء فى يومى كله

البوست كمان كويس

وربنا يدي الزعيم بطيخ

سلام بقى

amro said...

انا سمعت ان كامب ديفيد فيها ملاحق سرية، تفتكر دا صحيح؟
متفق معك الجيوش العربية كلها اخر كحرته، وتحولت الى بناء المصانع والمشاركة فى الزراعة، هو كويس بس هل دا دورها الاساسى؟
الغريب انها مازالت بتنتج اسلحة وتستوردها، تفتكر ليه؟
انا ضد اتفاقية كامب ديفيد لانها عملت كل اللى انت قلت عليه دا
تحياتى

islam yousef said...

marwa
فعلا الفراغ هوا اللى مالى حياتنا حاليا
و مع ذلك احنا معترضين ما احنا قاعدين نعد البسلة أهوا ما احانا حلوين كدة
شغل ايه و بتاع ايه
مش كفايه الكراسى الكتيرة اللى الدولة مدياهالنا ب
دون مقابل الحكومة مروقه علينا
تحياتى
ابقى سلميلى على صحابك المأنتخين فى الشغل
و خليلى شوية بسلة أعدهم



على باب الله
ماشى ياباشا انت بتحكم عن طريق الشكل
ممكن يكون االمظهر بيقولك كده
لكن انا قضيت فترة الجيش و كنا مقضينها اتنتخة
الطتيبة اللى انا كنت فيها
ما كانتش بتقوم على حيلها الا اما يجيلها زيارة
و الجيش الوقتى أكتر حاجة مهتمية بيها
العروض و سلام سلاح لسعادة المشير
تحياتى


goodman
أيوة عارف رأيك
بس المشكلة أعتراضاتنا دى هاتجيب فايدة
لينا تأثير؟
تحياتى


تامر نبيل
ازيك يا عم تامر
دى حاجة مش محتاجة فكاكة و رجوع للتاريخ
دى حاجة احنا شايفينها و وبنعانى منها
الأجيال اللى انت شايفها دى
نتيجة من نتايج معاهدة السلام
الغلا و الاكتئاب و الضياع و المخددرات
و غيرها
كل ده مش هايتغير الا |إذا المعاهدةدى بقت فى خبر كان
وو حتى لو ده حصل
لكن سابت تأثير كببير مش هايمحوه الا تغيير النظام
تحياتى


مايكل
مش عارف ليه يا جماعه انمتو ليه معترضين على أنتخة الجيش
الجيش لسه فيه معدات شغالة من أيام حرب 73 و من أيام الاتحاد السوفيتى
طب سؤال
لو قامت حرب الوقتى
هل إحنا جاهزين آلاتيا و معنويا اننا نخوضها
تحياتى يا مايكل


عين ضيقة
أهلا ببلدياتى
المدونه بتاعتك هيا كمان جميلة و شكرا على كلامك
فيه لقاء للمدونين فى الممنصورة اذا حبيتى تيجى
تحياتى


amro
ازيك يا باشا
و الله ممكن تقول ان الجيوش إتعدل دورها شوية من حماية للوطن و دور عسكرى
لدور مدنى زى ما انت زكرت
بس ده يدل على فقر الجيوش العربية و انها بتحاول تسند نفسها عن طريق الشغل المدنى؟
تحياتى